لندن: برطانیہ میں مسلسل کم بارش اور بڑھتے ہوئے درجہ حرارت کے باعث انگلینڈ کے تقریباً نصف حصے میں باضابطہ طور پر شدید خشک سالی (Drought) کا اعلان کر دیا گیا ہے۔ حکام نے پانی کے ذخائر میں خطرناک حد تک کمی کے پیش نظر شہریوں پر پانی کے استعمال سے متعلق مختلف پابندیاں نافذ کر دی ہیں۔
ماہرین کے مطابق گزشتہ کئی ماہ سے معمول سے کم بارش ہونے کے باعث دریاؤں، جھیلوں اور آبی ذخائر کی سطح مسلسل گر رہی ہے، جس سے پانی کی فراہمی اور زرعی شعبے کو شدید خطرات لاحق ہو گئے ہیں۔
متعلقہ حکام نے عوام سے اپیل کی ہے کہ وہ پانی کے غیر ضروری استعمال سے گریز کریں۔ نئی پابندیوں کے تحت باغات کو نلی (Hosepipe) سے پانی دینا، گاڑیاں دھونا، سوئمنگ پول بھرنا اور دیگر غیر ضروری مقاصد کے لیے پانی استعمال کرنے پر پابندی عائد کی جا سکتی ہے۔ ان ہدایات کی خلاف ورزی کرنے والوں کے خلاف جرمانے بھی کیے جا سکتے ہیں۔
ماحولیاتی ماہرین کا کہنا ہے کہ اگر آنے والے ہفتوں میں خاطر خواہ بارش نہ ہوئی تو خشک سالی مزید شدت اختیار کر سکتی ہے، جس سے زراعت، جنگلی حیات اور پینے کے پانی کی فراہمی پر منفی اثرات مرتب ہونے کا خدشہ ہے۔
حکومت اور پانی فراہم کرنے والی کمپنیوں نے شہریوں سے تعاون کی اپیل کرتے ہوئے کہا ہے کہ ہر فرد پانی کی بچت کو اپنی ذمہ داری سمجھے تاکہ دستیاب آبی وسائل کو زیادہ عرصے تک محفوظ رکھا جا سکے۔
Add Comment