کراچی: ورلڈ کپ 2026 میں مراکش نے ایک اور تاریخی کامیابی اپنے نام کرتے ہوئے نیدرلینڈز کو سنسنی خیز مقابلے کے بعد پنالٹی شوٹ آؤٹ میں 2-3 سے شکست دے کر اگلے مرحلے کے لیے کوالیفائی کر لیا۔ مقررہ وقت میں دونوں ٹیموں کے درمیان مقابلہ 1-1 گول سے برابر رہا، تاہم پنالٹی شوٹ آؤٹ میں اٹلس لائنز نے اعصاب پر قابو رکھتے ہوئے فتح اپنے نام کر لی۔
میچ کے دوران نیدرلینڈز کی جانب سے کوڈی گاکپو نے پہلا گول اسکور کیا، لیکن مراکش نے ہمت نہ ہاری اور اختتامی لمحات میں عیسیٰ دیوپ نے شاندار گول کر کے مقابلہ برابر کر دیا۔ بعد ازاں پنالٹی شوٹ آؤٹ میں اسماعیل صیباری نے فیصلہ کن پنالٹی اسکور کر کے مراکش کو تاریخی فتح دلا دی۔ مراکش کی اس کامیابی تک رسائی پورے ٹورنامنٹ میں شاندار کارکردگی کا تسلسل ہے۔ گروپ سی میں برازیل، اسکاٹ لینڈ اور ہیٹی کے ساتھ شامل مراکش نے اپنے پہلے میچ میں برازیل کے خلاف 1-1 سے ڈرا کھیلا، جس میں اسماعیل صیباری نے گول کیا۔ دوسرے میچ میں اسکاٹ لینڈ کو 0-1 سے شکست دی، جہاں بھی صیباری نے واحد اور فیصلہ کن گول اسکور کیا۔ گروپ مرحلے کے آخری میچ میں مراکش نے ہیٹی کو 2-4 سے ہرایا، جس میں اشرف حکیمی، اسماعیل صیباری، سفیان رحیمی اور یاسین نے گول کیے۔
تاہم اس کامیابی کے بعد سب سے زیادہ توجہ اس منظر نے حاصل کی جب فتح کے فوراً بعد مراکش کے تمام کھلاڑی میدان میں اکٹھے ہوئے اور اللہ تعالیٰ کا شکر ادا کرنے کے لیے سجدۂ شکر بجا لائے۔ یہ روح پرور منظر دنیا بھر میں سوشل میڈیا پر تیزی سے وائرل ہوا اور بین الاقوامی ذرائع ابلاغ نے بھی اسے نمایاں طور پر نشر کیا۔فٹبال شائقین کا کہنا ہے کہ مراکش نے ایک بار پھر ثابت کیا ہے کہ جذبہ، نظم و ضبط، ٹیم ورک اور مضبوط اعصاب کسی بھی بڑی ٹیم کو شکست دینے کی صلاحیت رکھتے ہیں۔ اٹلس لائنز اب ورلڈ کپ میں اپنی شاندار مہم جاری رکھتے ہوئے اگلے مرحلے میں نئی تاریخ رقم کرنے کے لیے پرعزم ہیں۔
Add Comment