ایک ان پڑھ عاشق جس نے زمانے کو عشق کا سبق پڑھا دیا – شبانہ اشفاق

کون تھے غازی علم دین شہید؟
1929 کا لاہور۔ ایک بدبخت راج پال نے ایک کتاب لکھ کر ہمارے پیارے نبی کریم ﷺ کی شان میں گستاخی کی۔ عدالتوں میں مقدمہ چلا، مسلمان تڑپتے رہے لیکن قانون نے اسے سزا نہ دی۔اسی لاہور کے ایک محلے میں ایک 19 سالہ نوجوان رہتا تھا، علم دین۔ نہ کوئی بڑا عالم، نہ کوئی مالدار، ایک عام بڑھئی کا بیٹا، جو خود بھی ترکھان کا کام کرتا تھا۔ لکھنا پڑھنا بھی بہت زیادہ نہیں جانتا تھا۔

لیکن اس کے سینے میں جو چیز تھی وہ بڑے بڑے پڑھے لکھوں کے پاس بھی نہیں تھی – *نبی ﷺ سے سچی محبت۔*

اس نے سوچا کہ جب قانون انصاف نہیں دے رہا تو مجھے اپنے محبوب ﷺ کی ناموس کے لیے کچھ کرنا ہوگا۔ اور 6 اپریل 1929 کو اس نے اس گستاخ کو اس کے انجام تک پہنچایا۔ پھر خود خوشی سے گرفتاری دے دی۔ اسے پھانسی کی سزا سنائی گئی اور 31 اکتوبر 1929 کو لاہور سینٹرل جیل میں اس عاشقِ رسول کو شہید کر دیا گیا۔

شہادت کے وقت اس کی عمر صرف 21 سال تھی۔
آج 2026 میں کوئی راج پال ہتھیار لے کر سامنے نہیں آتا، آج حملہ دوسرے انداز سے ہو رہا ہے۔

آج ہماری نوجوان نسل سے سنت کو مذاق بنا کر چھینا جا رہا ہے۔ داڑھی کو قدامت پسندی، پردے کو جہالت، اور دین پر چلنے کو دقیانوسی سوچ کہا جا رہا ہے۔ سوشل میڈیا پر ہمارے نبی ﷺ کے طریقوں کا مذاق اڑایا جاتا ہے اور ہم خاموشی سے سکرول کر کے آگے بڑھ جاتے ہیں۔

غازی علم دین نے ہمیں بتایا کہ عاشقِ رسول ہونے کے لیے پی ایچ ڈی کی ضرورت نہیں۔ اس نے یہ ثابت کیا کہ محبت ڈگریوں سے نہیں، دل سے ہوتی ہے۔

وہ ان پڑھ تھا لیکن آج 97 سال بعد بھی ہر 31 اکتوبر کو لاکھوں پڑھے لکھے اس کو یاد کرتے ہیں، اس کے لیے دعائیں کرتے ہیں۔ کیوں؟ کیونکہ اس نے محبت کا ثبوت دیا
اسلام ہمیں قانون ہاتھ میں لینے کا حکم نہیں دیتا۔ غازی کا دور اور تھا، آج کا دور اور ہے۔ آج ہماری ذمہ داری اور بھی بڑی ہے۔

غازی نے جان دے کر محبت ثابت کی، ہمیں آج اپنی زندگی دے کر محبت ثابت کرنی ہے۔
اگر کوئی ہماری سنت کا مذاق اڑائے تو غصہ کرنے کے بجائے، ہم خود سنت پر اتنا خوبصورت عمل کریں کہ دنیا دیکھے کہ اس میں کتنا سکون ہے۔
اپنے بچوں کو بتائیں کہ ہمارے نبی ﷺ کون ہیں؟ ان کی عزت کیا ہے؟ تاکہ کل کو کوئی ان کے ذہن خراب نہ کر سکے۔
نبی ﷺ نے تو دشمنوں کو بھی اخلاق سے جیتا تھا۔ آج ہم بھی اپنے اچھے کردار سے دین کی تبلیغ کریں۔

31 اکتوبر منانے کا اصل مقصد یہ نہیں کہ صرف ایک پوسٹ لگا دی۔ اصل مقصد یہ ہے کہ ہم اپنے دل میں جھانکیں کہ کیا ہمارے دل میں بھی اس نوجوان ترکھان جتنی محبت ہے؟
اللہ ہمیں بھی سچی عاشقِ رسول ﷺ والی زندگی نصیب فرمائے۔