نیٹ فلکس پر پاکستانی ڈرامے لانے کی تیاری

اسلام آباد: وفاقی وزیر برائے منصوبہ بندی و ترقی احسن اقبال نے کہا ہے کہ حکومت پاکستان پاکستانی ڈراموں اور فلموں کو عالمی اسٹریمنگ پلیٹ فارمز، خصوصاً نیٹ فلکس (Netflix)، ایمیزون پرائم ویڈیو (Prime Video) اور دیگر او ٹی ٹی پلیٹ فارمز پر زیادہ نمائندگی دلانے کے لیے عملی اقدامات کر رہی ہے۔ ان کے مطابق پاکستانی تخلیقی صنعت عالمی سطح پر اپنی منفرد شناخت رکھتی ہے اور حکومت چاہتی ہے کہ مقامی فلم سازوں، پروڈیوسرز اور فنکاروں کو بین الاقوامی مارکیٹ تک بہتر رسائی حاصل ہو۔

احسن اقبال نے کہا کہ پاکستانی ڈرامے اور فلمیں دنیا بھر میں پسند کیے جاتے ہیں، لیکن علاقائی رکاوٹوں اور موجودہ فریم ورک کی وجہ سے انہیں عالمی اسٹریمنگ پلیٹ فارمز پر وہ مقام نہیں مل سکا جس کے وہ مستحق ہیں۔ انہوں نے بتایا کہ حکومت نیٹ فلکس، ایمیزون پرائم ویڈیو اور دیگر عالمی کمپنیوں سے بات چیت کر رہی ہے تاکہ پاکستانی مواد کے لیے زیادہ جگہ اور طویل المدتی شراکت داری کے مواقع پیدا کیے جا سکیں۔